Songs from film MEHFIL-E-SHAB (ALBUM)

jab pukaara hai tujhe apani sada aayi ha
dil ki diwaar se lipati huyi tanhaayi hai

hai koyi jauhari ashqon ke naginon ka yahaan
aankh baazaar mein ik jins-e-giraan laayi hai

dil ki basti mein tum aaye ho kya paaoge
ab yahaan koyi tamaasha na tamaashaayi hai

dil bhi aabaad hai ik shahar-e-kamoshaan ki tarah
har taraf log magar aalam-e-tanhaayi hai

jis ki aankhon se barasati hain lahuu ki buundein
ye wohi mohasin-e-aashuftaa-o-saudaayi hai

teri kushi mein agar gam mein bhi kushi na huy
ye zindagi to muhabbat ki zindagi na huyi

kayaal-e-yaar salaamat tujhe kuda rakhe
tere bagair kabhi ghar mein roshani na huyi

saba ye unase hamaara payaam kah dena
gaye ho jab se yahaan subah-o-shaam hi na huyi

gaye the ham bhi ' jigar' jalwaagaah-e-jaanaan mein
wo puuchhate hi rahe hamase baat hi na huyi

wo dil-nawaaz hain lekin nazar shanaas nahi
mera ilaaj mere chaaraagar ke paas nahin

kabhi kabhi jo tere kurb mein guzaare the
ab un dinon ka tasavvur bhi mere paas nahin

guzar rahe hain ajab marahalon se didaa-o-dil
sahar ki aas to hai zindagi ki aas nahin

mujhe ye dar hai teri aarazuu na mit jaaye
bahut dinon se tabiyat meri udaas nahin

tere dilon mein bhi dil kaanp kaanp uthata hai
mere majaaj ko aasuudagi bhi raas nahin

tadap rahe hain zabaan par kayi sawaal magar
mere liye koyi shaayaan-e-iltamaas nahin

wo ke har ahad-e-muhabbat se mukarata jaay
dil wo zaalim ke usi shakhs pe marata jaaye

mere pahaluu mein wo aaya bhi to kushbuu ki tarah
main use jitana sametuun wo bikharata jaaye

ishq ki narm-nigaahi se bina wo rukasaar
kuub wo husn jo dekhe se nikharata jaaye

khulate jaayein jo tere band-e-kaba zulf ke saath
rang-e-pairaahan-e-jaan aur nikharata jaaye

kyuun na ham usako dil-o-jaan se chaahein ' dushnaam'
wo jo ik dushman-e-jaan pyaar bhi karata jaaye

yuun na mil mujhase kafa ho jais
saath chal mauj-e-saba ho jaise

log yuun dekh ke hans dete hain
tuu mujhe bhuul gaya ho jaise

hichakiyaan raat ko aatin hi nahin
tuune phir yaad kiya ho jaise

aise anjaan bane baithe ho
tumako kuchh bhi na pata ho jaise

ishq ko shirq ki had tak na badha
yuun na chhup hamase kuda ho jaise

maut bhi aayi to is naaz ke saath
mujhape ehasaan kiya ho jaise

zindagi bit rahi hai ' daanish'
ek be-zurm saza ho jaise